अशी बनवा मऊसूद साबुदाणा खिचडी, अजिबात चिकटणार नाही

उपवास म्हटला की सर्वात आधी आठवते ती म्हणजे साबुदाणा खिचडी. पण बऱ्याचदा साबुदाणा खिचडी बनवताना ती एकतर खूप चिकट होते किंवा खूप कडक होते. जर तुम्हालाही असा प्रश्न पडत असेल की मऊ आणि मोकळी साबुदाणा खिचडी कशी बनवायची, तर ही रेसिपी खास तुमच्यासाठी आहे. साबुदाणा खिचडी ही महाराष्ट्रातील एक अत्यंत लोकप्रिय आणि आवडती डिश आहे जी आषाढी एकादशी, महाशिवरात्री किंवा नवरात्रीच्या उपवासाला आवडीने खाल्ली जाते.

या रेसिपीमध्ये आपण पाहणार आहोत की साबुदाणा कसा भिजवायचा, शेंगदाण्याचा कूट किती वापरायचा आणि गॅसची आच कशी ठेवायची, जेणेकरून तुमची खिचडी एकदम मऊसूद आणि चविष्ट होईल. योग्य प्रमाणात बटाटा आणि मिरचीचा वापर केल्याने या साबुदाणा खिचडीची चव आणखी वाढते. चला तर मग, अजिबात वेळ न घालवता आपण ही सोपी आणि झटपट होणारी रेसिपी बनवायला सुरुवात करूया.

हे पण वाचा: मोत्यांसारखा मोकळा आणि सुटसुटीत साबूदाणा भिजवण्याची योग्य कृती

साहित्य

• 1/2 किलो साबुदाणा (रात्री भिजत घातलेला)
• 150 ग्रॅम ते 200 ग्रॅम शेंगदाणे (भाजून जाडसर कुटलेले)
• 1 मिडीयम आकाराचा बटाटा (बारीक चिरलेला)
• 3 ते 4 हिरव्या मिरच्या (कुटलेल्या किंवा बारीक चिरलेल्या)
• 2 ते 3 चमचे शेंगदाणा तेल
• चवीनुसार मीठ

कृती

1. सर्वात आधी रात्री भिजत घातलेला 1/2 किलो साबुदाणा एका मोठ्या ताटात घ्या आणि तो हाताने व्यवस्थित मोकळा करून घ्या.
2. आता या मोकळ्या साबुदाण्यामध्ये भाजलेल्या शेंगदाण्याचा जाडसर कूट टाका आणि सर्व व्यवस्थित मिक्स करून घ्या.
3. गॅसवर एक कढई गरम करण्यासाठी ठेवा आणि त्यात 2 ते 3 चमचे तेल टाका.
4. तेल गरम झाल्यावर त्यात बारीक चिरलेला 1 बटाटा टाका. बटाटा गोल्डन कलर येईपर्यंत आणि हलका होईपर्यंत तेलात चांगला भाजून घ्या.
5. बटाटा भाजल्यावर त्यात कुटलेली हिरवी मिरची टाका आणि परतून घ्या. मिरची तेलात परतल्याने तिचा तिखटपणा कमी होतो. यावेळी थोडेसे मीठ टाका.
6. आता यामध्ये शेंगदाण्याचा कूट मिक्स केलेला साबुदाणा टाका आणि सर्व मिश्रण एकत्र करा.
7. वरून चवीनुसार थोडे मीठ टाका.
8. आता गॅस मिडीयम किंवा मंद आचेवर ठेवा आणि खिचडी सतत हलवत राहा. साधारण 5 मिनिटे खिचडी चांगली परतून घ्या.
9. गॅस चुकूनही फास्ट करू नका, नाहीतर खिचडी कडक आणि वातड होईल.
10. तुमची गरमागरम आणि मोकळी साबुदाणा खिचडी तयार आहे.

काही खास टिप्स

• साबुदाणा भिजवताना त्यात साबुदाणा बुडेल इतपतच पाणी ठेवा, जेणेकरून तो मऊ भिजेल आणि चिकट होणार नाही.
• शेंगदाणे नेहमी खरपूस भाजा आणि त्याचा जाडसर कूट करा. अगदी बारीक कूट केल्यास खिचडी चिकट होऊ शकते.
• खिचडी बनवताना शक्यतो शेंगदाणा तेलाचा वापर करा, यामुळे खिचडीला चांगली चव येते.
• गॅसची आच कायम मंद ते मिडीयम ठेवा. मोठ्या आचेवर साबुदाणा परतल्यास तो चिवट आणि कडक होतो.

विविध प्रकार

• तिखट साबुदाणा खिचडी: जर तुम्हाला जास्त तिखट आवडत असेल, तर तुम्ही मिरचीसोबत थोडेसे लाल तिखट देखील वापरू शकता.
• बटाट्याशिवाय खिचडी: तुम्हाला जर बटाटा आवडत नसेल, तर तुम्ही बटाटा न टाकताही ही खिचडी बनवू शकता.
• बिना उपवासाची खिचडी: जर तुम्ही ही खिचडी उपवासासाठी बनवत नसाल, तर तुम्ही फोडणीत जिरे, कोथिंबीर आणि कढीपत्ता नक्की टाका.

कशासोबत खावे?

• ही खिचडी तुम्ही गोड किंवा ताज्या दह्यासोबत खाऊ शकता.
• उपवासाच्या लिंबाच्या लोणच्यासोबत साबुदाणा खिचडी खूप छान लागते.
• गरमागरम चहा आणि साबुदाणा खिचडी हे कॉम्बिनेशन नाश्त्यासाठी उत्तम आहे.

सतत विचारले जाणारे प्रश्न

प्रश्न 1: साबुदाणा खिचडी चिकट का होते?
उत्तर: साबुदाणा भिजवताना त्यात जास्त पाणी राहिल्यास किंवा शेंगदाण्याचा कूट खूप बारीक वाटल्यास साबुदाणा खिचडी चिकट होते.

प्रश्न 2: खिचडी मऊ करण्यासाठी काय करावे?
उत्तर: साबुदाणा नेहमी व्यवस्थित भिजलेला असावा आणि खिचडी नेहमी मंद आचेवर 5 मिनिटे परतावी. मोठा गॅस केल्यास खिचडी वातड होते.

प्रश्न 3: खिचडीत किती शेंगदाण्याचा कूट वापरावा?
उत्तर: 1/2 किलो साबुदाण्यासाठी साधारण 150 ग्रॅम ते 200 ग्रॅम शेंगदाण्याचा जाडसर कूट पुरेसा होतो.

प्रश्न 4: साबुदाणा खिचडीसाठी कोणते तेल वापरावे?
उत्तर: उपवासासाठी बनवताना नेहमी शेंगदाणा तेल किंवा साजूक तुपाचा वापर करावा.